Zum Inhalt springen

Erstmäuch werdä

So chasch dich bi üs melde

Du hesch am offizielle Erschtmäuch-Infoalass kei Ziit? Keis Problem: Du chasch au suscht JEDERZIIT bi üs ine Proob ineluege.
Falls du es Mitglied vo üsere Gugge kennsch, chasch dich direkt bi dere Person melde.
Wenn dich über d’Websiite wotsch ahmelde, gfindsch s’Ameldeformular under >Kontakt>Mitglied werden

Das meinet üsi ehemalige Erschtmäuche zu ihrem erschte Jahr ide Gugge

„Mer hed chönnä gschiire und mache, alli hend spass gha und niemert isch ufne andere hässig worde“

„S beschtä isch d taufi gsi vo üsem erschtmäuche-götti“

„Mer wird vo ahfang ah ufgno wie inere familie. Ad fasnacht gah, öppe die eis näh, musig machä, macht inere gugge viel meh spass. S schminke vorem abfahre“

„En unbeschriiblichi familie mit gross und chlii“

„Ä huifä dublä aber trotzdem alli cool“

„Immer bereit für en gueti stimmig“

„D Chältis sind ä kunterbuntä Huifä wo offä und liäb zuenand isch“

„Mega cooli Truppe, immer lustig und me chan viel erläbe“

„Zämä sii, zämä hockä, zämä trinkä“

FAQ

Was isch en Erschtmäuch?
Mier nennet üsi Neumitglieder im erschte Jahr „Erschtmäuch“. Ade GV nach de Fasnacht wirsch den als offiziells Mitglied ufgno.

Wenn sött mer sich als Erschtmäuch melde?
Theoretisch chasch s ganz Jahr mit üs Kontakt ufnäh. Am beschte bisch scho debii, wenns mit de Suechi nachem Motto und de Liederwahl losgaht. Üse Mottohock isch jewils im Mai. Es isch aber au möglich bis im September bi üs mal inezluege ine Proob oder mit üs es Biär go znäh.

Wenn findet d Probe statt?
Mier fanget im September aa probä bis hii zur Fasnacht. Am Mittwuchabig isch jewils Bläserproob und am Fritigabig Rhytmusproob und denn Gsamtproob.

Wie nimm ich am Beschte mit üch Kontakt uf?
Falls öpper vode Chältis kennsch, chasch dich grad bi dere Person melde und eifach mal mitcho ane Proob. Suscht über s Kontaktformular obe uf der Siite oder au über Facebook & Instagram.

Was het mer für Ufgabe als Erschtmäuch?
Bi üs lueget d Erschtmäuche amene Fäscht zude Instrument, falls nötig. Am Probeweekend organisieret ier e Mottoparty und Spili. Ide Proobe stellet ier d Getränk uf und ruumet sie am Schluss wieder wäg. Das wär glaub alles…

Gits en Erschtmäuch-Taufi?
Ja und bis jetzt hets nu jede überläbt 😉 Üche Erschtmäuch-Götti wird das für üch vorbereite.

Muess mer sich schminkä?
Ja das muess mer bi üs. Es git aber oft es Schmink-Apéro wo mer sich cha la amale und es Biär näh. Bi üs gits 3 Reglä zum Schminkä: Kei Glitzer, mindestens 3 Farbe und ganz wichtig: au d Ohreläppli müend Farb dra ha.

Was muess mer als Erschtmäuch aleggä?
Bi üs legget d Erschtmäuche ide Vorfasnacht s Gwändli vom Vorjahr aa. Am Schmudo wärdet ier zäme mitem Rescht s erscht mal s neue Gwändli ahaa.

Wie funktioniert das mit de Instrument?
Solangs gnueg het, bechunsch du vo de Gugge es Instrument über. Im erschte Jahr sogar uf sicher. Du chasch üs din Wunsch agäh, was du für es Instrument wetsch spilä, aber schlussendlich müemmer luege, dass es mit de Verteilig ufgaht.

Muess ich scho es Instrumen chönne spilä?
Nei muess mer nid. Du chasch bi üs jedes Instrument lerne, vili vo üs hend au devor no nie das Instrument gspilt, wo sie ide Gugge spilet. Es hilft natürlich, wenn vorher schomal es Instrument gspilt hesch.

Muess ich chönne Note läsä?
Nei nid zwingend. Mier spilet zwar ide Probä nach Noteblätter, aber det sind unter de Note au no Zahle agschribe. Sprich, es wär guet wenn du Zahlä läsä chönntsch…

Muess mer bi üch a Fäscht schaffä?
Ja, i üsem Gugge Lokal hemmer unterem Jahr mehreri Fäscht. Det hilft jede mal hinter de Bar, bim ufstelle oder bim ufruume. Ade Fasnacht organisiere mier de Guggeüberfall, de Schmudo und de Güdis-Mäntig mit. Das heisst mier hend alli mal e Barschicht und sind iteilt zum Ufbau und Abbau vo üsem Zelt oder Container.

Machet ier au übere Summer öppis mitenand?
Nach de Fasnacht isch vor de Fasnacht! Es fangt also scho glii wieder aa mit de Fasnachtsplanig ade GV, am Mottohock oder Herbstversammlig. Mier machet aber au gärn eifach so öppis mitenand, sigs ade Ustrinkätä, a üsem VIP- & Hälfer-Fäscht oder suscht irgendwo es Biär am näh.

Wie alt muess mer sii zum id Gugge cho?
Söttsch spötischtens ade Fasnacht 18 wärde.